हेटौँडा । बागमती प्रदेशका मुख्यमन्त्री इन्द्रबहादुर बानियाँले प्रदेशलाई छिट्टै ‘मानवताको प्रदेश’ घोषणा गर्ने बताएका छन् ।
शुक्रबार हेटौँडामा सम्पन्न मानव सेवा आश्रमको १३ औँ वार्षिक साधारण सभामा सम्बोधन गर्दै उनले सडकमा आश्रयहीन, असहाय र विपन्न नागरिकलाई व्यवस्थापन गरेर बागमती प्रदेशलाई मानवताको उदाहरणीय प्रदेश बनाइने बताएका हुन् ।
मुख्यमन्त्री बानियाँले यसअघि दुई प्रदेशले सडक मानवमुक्त घोषणा गरिसकेको भन्दै अब तेस्रो नम्बरमा बागमती प्रदेशले मानवताको नाममा इतिहास रच्ने बताए । उनले मानव सेवा आश्रमले सुरु गरेको कार्यलाई प्रशंसा गरे ।
उनले मानव सेवा आश्रमको सेवा प्रदेशका १३ वटै जिल्लामा विस्तार गर्न सरकारले पूर्ण सहयोग गर्ने दृढता व्यक्त गरे । साथै आवश्यक परे संघीय सरकार मातहतका खाली भवन आश्रमलाई उपलब्ध गराउने पहल गर्ने उनले प्रतिबद्धता जनाए ।
“समाजलाई कसरी सुधार्ने र टुटेका मनलाई कसरी जोड्ने भन्ने विषयमा हामी सबैले सोच्नुपर्ने छ,” मुख्यमन्त्री बानियाँले भने, “यस अभियानमा प्रदेश सरकार दृढतापूर्वक साझेदार बन्नेछ ।”
