हेटौँडा । बागमती प्रदेशको कृषि तथा पशुपन्क्षी विकास मन्त्रालयले गत आर्थिक वर्ष २०८१–०८२ को प्रगति विवरण सार्वजनिक गरेको छ । मन्त्रालयले आव २०८१–०८२ मा मन्त्रालयबाट सम्पादन भएका कार्यहरुको प्रगति विवरण पत्रकार सम्मेलनमार्फत् सार्वजनिक गरेको हो ।
कृषि तथा पशुपन्क्षी विकास मन्त्री प्रकाश श्रेष्ठले ३६ बुँदामा मन्त्रालयमा उपलब्धि विवरण सार्वजनिक गरेका हुन् । उनले कृषि विकास कार्यालय र पशु सेवा कार्यालय नरहेको जिल्लाहरुमा कृषि र पशु सेवा केन्द्र स्थापना गरी सेवा प्रवाह गराइएको बताए ।
उनले कृषि उत्पादनमा स्वनिर्भर वडा निर्माण गर्न ५ वर्षसम्म सञ्चालन हुने गरी गत आर्थिक वर्ष र चालु आर्थिक वर्षबाट छनौट भएका ७० वडामा साझेदारसँग सम्झौता भई कार्यक्रम कार्यान्वयन भइरहेको, प्रत्येक वडामा ४० लाखका दरले सहयोग प्रदान गरिएको, भेडा बाख्रामा लाग्ने पिपिआर रोग नियन्त्रणको लागि १५ लाख ३२ हजार ३ सय २६ भेडा बाख्रालाई खोप लगाइएको बताए ।
यसैगरी, ७१ हजार ९ सय ७७ गाईभैंसीमा लम्पी स्किन रोग विरुद्धको खोप निःशुल्क रुपमा लगाइएको, हेटाँंडा उपमहानगरपालिका वडा नं. १० मा दैनिक करिब ६० हजार लिटर दुधको पाउडर उत्पादन गर्न सक्ने गरी निर्माण सम्पन्न भएको दुध पाउडर प्लान्टको सञ्चालन विधि अन्तिम चरणमा रहेको जानकारी दिँदै उनले हेटौँडा ११ मा प्रदेश सरकारको ७० प्रतिशत र उपमहानगरपालिकाको ३० प्रतिशत लागत साझेदारीमा निर्माण भएको प्रादेशिक कृषि थोक बजार यही साउन १८ गते उपमहानगरपालिकालाई हस्तान्तरण गरी तत्काल सञ्चालनमा ल्याइने समेत बताए ।
गुणस्तरीय भेटेरिनरी सेवालाई विस्तारको लागि चितवनमा आधुनिक भेटेरिनरी अस्पताल निर्माण गरिएको दाबी गर्दै उनले पशु स्वास्थ्य तथा क्लिनिकल सेवालाई विस्तार गर्न स्थानीय तहसंगको समन्वयमा प्रदेशका २६ स्थानमा निर्माणधिन ‘एक वडा एक पशु स्वास्थ्य क्लिनिक’ मध्ये मकवानपुरमा ३ वटा, सिन्धुलीमा २ , रामेछापमा २, दोलखामा ३, सिन्धुपाल्चोकमा ३, काभ्रेमा ५ र चितवनमा ४ गरी २२ वटा भवनको निर्माण कार्य सम्पन्न भई सम्बन्धित स्थानीय तहलाई हस्तान्तरण गरिएको जानकारी दिए ।
यसैगरी, मन्त्रालयले कृषि ज्ञान रत्न प्रवद्र्धन कार्यक्रम अन्तर्गत स्नातक गरेकोलाई ८ लाख, स्नात्तकोत्तर गरेकोलाई १० लाख र विद्यावारिधी गरेकोलाई २२ लाखको दरले सहयोग गरेको, चितवन जिल्लामा उन्नत विउ उत्पादनका लागि १ हजार २ सय ५३ कृषकहरुलाई १ करोड ४४ लाख रुपैंया प्रोत्साहन रकम उपलब्ध गराइएको, प्रदेशको ९ वटा स्थानीय तहमा सुचना प्रविधिमा आधारित कृषि बजार केन्द्र स्थापना गरी विषादी परीक्षण प्रयोगशाला, कृषि एम्बुलेन्स सहितको सेवा समेत उपलब्ध लगायत विवरण सार्वजनिक गरिएको छ ।
मन्त्रालयले गत आर्थिक वर्षमा २ अर्ब ५० करोड ६४ लाख कुल विनियोजित बजेटमध्ये ६७ दशमलब २९ प्रतिशत बजेट खर्च गरेको थियो ।
