हेटौंडा । राक्सिराङ गाउँपालिका–७ ध्यारीटोलमा भएको आगलागीमा एक तले घर पूर्णरूपमा जलेर नष्ट भएको छ। बिहीबार दिउँसो करिब २:३० बजे ७० वर्षीया आईती मायाँ प्रजाको ढुङ्गामाटोको गारो र खरको छानो भएको घरमा सोलारको तार सर्ट भएर आगलागी भएको जिल्ला प्रहरी कार्यालय मकवानपुरले जानकारी दिएको छ।
आगलागीमा घरभित्र रहेका लत्ताकपडा, भाडाकुडा, सुनको एक थान तिलहरी, मकै ५ मुरी र नगद ७० हजार रुपैयाँसहित करिब ४ लाख रुपैयाँ बराबरको क्षति भएको प्रारम्भिक अनुमान छ। घटनाको जानकारी भोलिपल्ट (शुक्रबार) बिहान ९ बजेपछि प्राप्त हुनासाथ प्रहरी चौकी कान्द्राङबाट प्र.स.नि. सुरेश कुमार साहको कमाण्डमा टोली घटनास्थल पुगेर मुचुल्का उठाएको थियो।
प्रहरीका अनुसार आगलागीबाट घर पूर्ण रूपमा जलेर नष्ट भएको र मानवीय क्षति भने भएको छैन घटनास्थल प्रहरी चौकी कान्द्राङबाट करिब १६ किलोमिटर दक्षिणमा पर्छ।
