हेटौँडा । हाल देशका विभिन्न स्थानमा झाडापखाला तथा हैजा फैलिरहेको अवस्थामा मकवानपुर जिल्लामा पनि रोग फैलन सक्ने जोखिम बढेको भन्दै हेटौँडा खानेपानी व्यवस्थापन बोर्डले उपभोक्तालाई उच्च सतर्कता अपनाउन आग्रह गरेको छ । बोर्डले आइतबार सूचना जारी गर्दै सो आग्रह गरेको हो ।
बोर्डका प्रमुख प्रशासकीय अधिकृत विष्णु प्रसाद सापकोटाले हस्ताक्षर गरेको सूचनामा, “हालै विभिन्न स्थानमा देखिएको झाडापखाला र हैजाको प्रकोपलाई ध्यानमा राखी मकवानपुरमा पनि सतर्कता आवश्यक छ । सुरक्षित पानी प्रयोग र सरसफाइमा ध्यान दिएमा रोग फैलन सक्ने जोखिमलाई धेरै हदसम्म कम गर्न सकिन्छ,” उल्लेख छ ।
बोर्डले पिउने पानी अनिवार्य रूपमा उमालेर वा क्लोरिन प्रयोग गरेर मात्र सेवन गर्नुपर्ने, घर वरपरको सरसफाइमा ध्यान दिनुपर्ने, खाना राम्ररी पकाएर मात्र खानुपर्ने र काँचो तरकारी तथा फलफूललाई शुद्ध पानीले धुने सुझाव दिइएको छ । साथै, पाइप फुटेर पानी चुहिएको वा प्रदूषित भएको खण्डमा तुरुन्तै सम्बन्धित कार्यालयलाई जानकारी गराउन पनि अनुरोध गरिएको छ ।
हाल वीरगञ्ज लगायतका स्थानमा झाडापखालाको प्रकोप फैलिसकेको छ भने मकवानपुरमा पनि यस्तै अवस्था दोहोरिन सक्ने सम्भावना रहेकाले बोर्डले उपभोक्ताहरूलाई सचेत रहन आह्वान गरेको हो।
