हेटौँडा । राष्ट्रिय ख्रिष्टियन महासंघ मकवानपुरको आयोजनामा ख्रिष्टमस उत्सव तथा नव वर्ष सन् २०२६ को अवसरमा शुभकामना आदानप्रदान कार्यक्रम सम्पन्न भएको छ । उक्त कार्यक्रममा बागमती प्रदेशका मुख्यमन्त्री इन्द्रबहादुर बानियाँको प्रमुख आतिथ्यतामा सम्पन्न भएको हो ।
कार्यक्रममा बोल्दै मुख्यमन्त्री बानियाँले सबै धर्म, जाति र संस्कृति भएकाहरूबीच आपसी सम्मान र सहकार्य बढाउन योगदान पुर्याउने विश्वास व्यक्त गरे । उनले विविधताको सुन्दरता नै नेपालको पहिचान भएको उल्लेख गर्दै सामाजिक सद्भाव, धार्मिक सहिष्णुता र समतामूलक विकासका लागि सबै समुदाय एकजुट हुनुपर्नेमा जोड दिए ।
राष्ट्रिय ख्रिष्टियन महासंघ मकवानपुरका प्रतिनिधिहरूले ख्रिष्टमस उत्सवले समाजमा भाइचारा, सेवा भावना र मानवताको मूल्यलाई अझ सबल बनाउने बताए । उनीहरूले प्रदेश सरकारसँग सहकार्य गर्दै सामाजिक तथा मानव सेवा कार्यक्रमहरूलाई थप प्रभावकारी रूपमा अघि बढाउने प्रतिबद्धतासमेत जनाए ।
कार्यक्रममा राजनीतिक दलका प्रतिनिधि, सामाजिक अभियन्ता, धर्मका अगुवाहरू, स्थानीयवासी तथा विभिन्न संघ–संस्थाका पदाधिकारीहरूको सहभागिता रहेको थियो । साथै कार्यक्रममा सांस्कृतिक प्रस्तुतिहरू, प्रार्थना तथा मैत्रीपूर्ण अन्तरक्रियासहित सम्पन्न गरिएको आयोजकले जानकारी दिएको छ।
