हेटौंडा । मकवानपुरको हेटौंडा उपमहानगर–४ कर्रा चोकमा मोटरसाइकलले ठक्कर दिँदा एक पैदल यात्रीको मृत्यु भएको छ। बिहीबार साँझ करिब ६:३० बजे पूर्व–पश्चिम राजमार्गमा पशुपतिनगरबाट हेटौंडा बजारतर्फ आउँदै गरेको ना ३८ प ५८५० नम्बरको मोटरसाइकलले पैदल यात्री ५५ वर्षीय खुइली डोमलाई ठक्कर दिएको जिल्ला प्रहरी कार्यालय मकवानपुरले जानकारी दिएको छ।
प्रहरीका अनुसार घाइते अवस्थामा ६:४२ बजे हेटौंडा अस्पताल पुर्याइएकी डोमको चिकित्सकले ६:५० बजे उपचारका क्रममा उनको मृत्यु भएको घोषणा गरेका हुन् । मृतक डोम मूलघर पर्सा, वीरगञ्ज महानगरपालिका–१६ नागुवा भए पनि हाल हेटौंडा उपमहानगरपालिका–१० कर्रामा डेरा गरी बस्दै आएकी थिइन्।
दुर्घटनामा संलग्न मोटरसाइकल र बारा, सिम्रौनगढ नगरपालिका–११ का २५ वर्षीय चालक सुनिल ठाकुरलाई प्रहरीले नियन्त्रणमा लिएर आवश्यक अनुसन्धान अघि बढाएको बताइएको छ । लास पोष्टमार्टम तथा अन्य प्रक्रिया पूरा गर्न हेटौंडा अस्पतालमै राखिएको प्रहरीले जनाएको छ।
