हेटौँडा । बागमती प्रदेश सरकारले आजको मन्त्रिपरिषद् बैठक साढे ५ बजेका लागि बोलाएको छ । यसअघि साढे २ बजेको लागि तय गरिएको बैठक सारिएको भौतिक पूर्वाधार विकासमन्त्री अमनकुमार मास्केले जानकारी दिए ।
प्रदेश सरकारमा सत्ता साझेदार दलहरूबीच बजेटको विषयमा मतभेद चुलिँदा बैठक सारिएको हो । नेकपा एमाले र नेपाली कांग्रेसबीच ६८ अर्बभन्दा बढीको बजेट नल्याउने सहमति भए पनि मुख्यमन्त्री बहादुर सिंह लामा र आर्थिक मामिला तथा योजना मन्त्री कुन्दनराज काफ्लेले करिब ७२ अर्ब रुपैयाँ बजेट प्रस्ताव गरेपछि विवाद उत्पन्न भएको बुझिइएको छ ।
एक सांसदका अनुसार, सत्ता गठबन्धनमै सहमति नहुँदा मन्त्रिपरिषद् बैठक तोकिएको समयमा सुरु हुन नसकेको हो । मन्त्रिपरिषद् बैठक बस्न नसकेपछि प्रदेश सभा बैठक पनि सारिएको हो । प्रदेश सभा साढे ६ बजेका लागि सारिएको हो ।
अब मन्त्रिपरिषद्ले बजेट पारित गरेपछि मात्रै त्यसलाई प्रदेशसभामा प्रस्तुत गरिनेछ । तर, साझेदार दलहरूबीच सहमति नजुटे मन्त्रिपरिषद्ले नै बजेट पारित गर्न सक्ने वा नसक्ने भन्ने अन्योल कायमै रहेको छ।
