मकवानपुर । बागमती प्रदेशमा भोलिदेखि पशुचौपायामा लाग्ने लम्पी स्किन रोगविरुद्ध सप्ताहव्यापी खोप अभियान सञ्चालन हुँदैछ ।
अहिले गाई/भैँसीमा लम्पी स्किन रोग देखा पर्नेक्रम बढेको र यसको रोकथाम तथा नियन्त्रणका लागि सप्ताहव्यापी खोप अभियान सञ्चालन गर्न लागेको प्रदेशको कृषि मन्त्रालयले जनाएको छ ।
मन्त्तालयका अनुसार, अभियान अन्तर्गत प्रदेशभरका एक सय १९ वटा पालिकामा झन्डै एक लाख २० हजार डोज खोप निःशुल्क वितरण गर्ने तयारी गरिएको छ ।
खोप अभियानको शुरुवात ललितपुरबाट गरिनेछ भने त्यसपछि अन्य १३ वटै जिल्लामा सञ्चालन गर्ने मन्त्रालयले जनाएको छ । आर्थिक वर्ष २०८०/०८१ मा बागमती प्रदेशमा ११ हजार दुई सयभन्दा धेरै गाईभैँसी लम्पी स्किन रोगका कारण मरेका तथ्याङ्क रहेको छ ।
यसअघि बागमती प्रदेशभर दुई लाख ४५ हजार दुई सयभन्दा धेरै गाई तथा भैँसीलाई लम्पी स्किन रोगविरुद्धको खोप लगाइसकिएको मन्त्रालयले जनाएको छ ।
