हेटौंडा । नेपाली कांग्रेसले काठमाडौं जिल्ला कीर्तिपुर नगरपालिकाको नगर प्रमुख पदमा कृष्णमान डंगोललाई उम्मेदवार बनाउने भएको छ । शनिबार नेपाली कांग्रेस बागमती प्रदेश संसदीय समितीले डंगोललाई उम्मेदवार बनाउने निर्णय गरेको हो ।
कांग्रेसबाट निर्वाचित राजकुमार नकर्मीको निधन भएपछि कीर्तिपुरको नगर प्रमुख पद रिक्त रहेको थियो। उक्त पदमा मंसिर १६ गते उप निर्वाचन तोकिएको छ ।
कीर्तिपुरको मेयरमा डंगोलसहित स्वर्गीय नकर्मीकी श्रीमती जमुनालगायत एक दर्जन नेताहरुले आकांक्षा राखेका थिए । उपनिर्वाचनका लागि एमालेले डा. सुरेन्द्र मानन्धर, माओवादी केन्द्रले प्रा. डा. शिवशरण महजन र राप्रपाले ध्रुव महर्जनलाई उम्मेदवार बनाएको छ । राष्ट्रिय स्वतन्त्र पार्टीले भने उम्मेदवार तोकेको छैन ।
उपनिर्वाचनका लागि आइतबार मनोनयन पत्र दर्ता हुँदैछ । बिहान १० देखि अपराह्न ५ बजेसम्म सम्बन्धित स्थानीय तहमा स्थापना भएका निर्वाचन अधिकृतको कार्यालयमा उम्मेदवारको मनोयन दर्ता हुने निर्वाचन आयोगका सहसचिव एवं प्रवक्ता नीता पोखरेल अर्यालले जानकारी दिइन् ।
विभिन्न कारणले स्थानीय तहमा रिक्त जिल्ला समन्वय समितिका प्रमुख दुई, गाउँपालिका अध्यक्ष दुई, उपाध्यक्ष चार, नगरपालिका प्रमुख र उपप्रमुख एक/एक र वडाध्यक्ष ३४ गरी जम्मा ४४ रिक्त पदमा निर्वाचन हुँदैछ ।
काँग्रेस बागमती प्रदेश संसदीय समितिले दिवंगत नकर्मीप्रति उच्च सम्मान सहित श्रद्धाञ्जली अर्पण गर्दै उपनिर्वाचनमा काँग्रेसको उम्मेदवारलाई विजयी गराउन समेत अनुरोध गरेको छ।
