हेटौँडा । युवाहरूको नेतृत्व तथा व्यक्तित्व विकासमा सक्रिय संस्था जेसीआई हेटौँडाको वर्ष २०२६ को नेतृत्वका लागि सन्तोष पराजुलीले उम्मेदवारी घोषणा गरेका छन् ।
लामो समयदेखि संस्थाको विभिन्न जिम्मेवारी सम्हालेका पराजुलीले ’सबल र समावेशी जेसीज’को एजेन्डासहित शाखा अध्यक्ष पदमा उम्मेदवारीको घोषणा गरेका हुन् ।
पराजुलीले आफ्नो कार्यकालका लागि सदस्य सशक्तीकरण, दिगो नेतृत्व, समावेशी वातावरण र संस्थागत सुदृढीकरण चारवटा मुख्य स्तम्भहरू सार्वजनिक गरेका छन् ।
जसमा सदस्यहरूको व्यक्तिगत र व्यावसायिक वृत्तिविकासका लागि उच्चस्तरीय तालिम प्रदान गर्ने, संस्थाको दीर्घकालीन विकासका लागि रणनीतिक योजना र नयाँ पुस्ताको संलग्नता सुनिश्चित गर्ने, सामूहिक निर्णय प्रक्रिया र सबै सदस्यहरूको विचारको सम्मान गर्ने पद्धति बसाल्ने तथा प्रशासनिक र नेतृत्व संरचनालाई प्रविधिमैत्री र व्यवस्थित बनाउने योजना रहेको उनले बताए ।
उनका अनुसार, आगामी निर्वाचनका लागि आफ्नो नेतृत्वमा एक बलियो टिम निर्माण गरिएको छ । उनको टिमबाट कार्यकारिणी उपाध्यक्ष पदमा विपिन ताम्राकार र संजय कुमार न्यौपाने उम्मेदवार रहेका छन् भने उपाध्यक्ष पदका लागि बिकेक बानिया, अशोक सिंह, विनोद वाग्ले र सृजनराज बज्राचार्यले आफ्नो उम्मेदवारी प्रस्तुत गरे ।
हेटौँडाका युवाहरुमाझ लोकप्रिय र कुशल संगठकको छवि बनाएका पराजुली र उनको प्यानलका उम्मेदवारहरुलाई जेसीआई वृत्तमा उत्साहका साथ हेरिएको छ ।
सन् २०१९ देखि जेसीआईमा आबद्ध पराजुलीले यसअघि शाखाको सचिव, उपाध्यक्ष, तालिम संयोजक र कार्यकारिणी उपाध्यक्ष जस्ता महत्वपूर्ण पदहरूमा रहेर आफ्नो क्षमता देखाउँदै आएका छन् ।
